ردت سمر عنتر طالبة كلية التربية الرياضية جامعة أسيوط، على الهجوم الذي تعرضت له على إثر انتشار فيديو لها وهي ترقص في حفل التخرج الخاص بدفعتها، بثوب الخريجين وقبعة التخرج الشهيرة.
"ماعملتش حاجة غلط"
واعتبرت الطالبة، أن فيديو الرقص الذي هاجمها رواد وسائل التواصل الاجتماعي بسببه "مافهوش حاجة غلط، ولم أفعل أي شيء يعيبني أو يعيب أهلي، كان مجرد طريقة للتعبير عن فرحتي بالتخرج".
وقالت سمر: "لم أتوقع رد الفعل، كل الحكاية إن كنت فرحانة زي أي حد كان فرحان في يوم تخرجه، ليه أصحى ألاقي نفسي تريند والناس بتهاجمني رغم إن ماعملتش حاجة غلط".
وأضافت: "لم أخطط لركوب التريند زي ما الناس ادعت عليا، حتى ماشيرتش الفيديو على صفحتي، والشركة المسؤولة عن تصوير الحفلة هي اللي نشرته بموافقتي".
"الحفلة كلها رقصت"
وتابعت سمر: "مش شايفة إن في حاجة غلط، أنا فخورة بنفسي، وماغلطتش وأنا مش أول ولا أخر واحدة رقصت، والحفلة كلها كانت بترقص، وكل ده كان صدفة".
وأكملت: "البنات أكثر فئة هاجمتني، وراقبت التعليقات علشان اعرف مين معايا ومين عليا، ودا أحزنني لأني مش الوحيدة اللي رقصت في الحفلة، أنا لا قسمت ولا هزيت عكس ناس كتير في الحفلة رقصت وهزت بفساتين سواريه، واللي حصل معايا بسبب إن كنت مميزة ولبسي كان مميز".
وزادت سمر: "أنا تعبت في حياتي، وأتمنى كل واحد يبقى في حالة، وأنا ما أجرمتش وماكنتش في كباريه، واعرف ربنا كويس، وأهلي كانوا حاضرين الحفل، وهما واثقين فيا".
وواصلت: "أنا كنت بتمشى، وعملت حركات عادية مش شعبية، ودا مش رقص، الناس كانت مبهورة بيا، وفي بنت اتخرجت من النوبة كانت لابسة فستان مفتوح في حفل تخرجها ورقصت على أغاني نوبية، وماحصلش حاجة، فاشمعنى أنا اللي حصل معايا ده".
"لا أهتم بالانتقادات"
وختمت سمر: "أنا وأهلي مش شاغلين بالنا بالانتقادات، الرسول نفسه الناس انتقدته، وباخد سكرين شوت لأي حد بيخوض في سمعتي وهقاضيه، والفرحة مش حرام، ولو رجع يوم التخرج بتاعي تاني هعمل أكتر من كده، علشان ماغلطتش".
الجامعة ترد
بدورها، أكدت جامعة أسيوط، في بيان عبر صفحتها الرسمية على فيسبوك، "عدم مسؤوليتها عن أي حفلات تخرج أو أنشطة يتم تنظيمها خارج أسوار الجامعة".
وأضاف البيان: "تعلن جامعة أسيوط عدم مسؤوليتها عن أي حفلات تخرج أو أنشطة يتم تنظيمها خارج أسوار الجامعة وبغير موافقة الجامعة".
وتابع: "الجامعة مسؤولة فقط عن حفلات التخرج التي تنظمها الكليات داخل أسوار الجامعة تحت رعاية أعضاء هيئة التدريس والعاملين بإدارة رعاية الشباب".
وقال البيان: "تحذر الجامعة من استخدام أي كيانات لاسم جامعة أسيوط في أي حفلات أو أنشطة تحمل اسم الجامعة بدون موافقة كتابية من الجامعة، وتناشد أبنائها الطلاب عدم الانسياق لأية حفلات أو أنشطة يتم تنظيمها خارج الجامعة".
